Denak

AZUKRE KRISTALDUZKO PIRULETAK

piruletas-cristalizadas
MATERIALAK
  • Edalontzikada bat ur
  • 3-4 edalontzikada azukre
  • Jakientzako koloregaia eta gozogintzako urrinak (aukerakoa)
  • Izozkiak egiteko zotzak
  • Arropa esekitzeko pintzak
  • Edalontziak eta platerak
  • Kazola, eta egurrezko koilara bat
  • Aluminiozko papera edo sukaldeko papera
  • Heldu baten laguntza, ur azukreztatua egosteko

NOLA EGITEN DA?

  • Jarri kazolan ura berotzen.
  • Gehitu azukrea, pixkanaka, eta eragin.
  • Jarraitu, nabaritu arte ez dagoela azukre gehiago urtzerik.
  • Ez utzi luzaroan irakiten; denbora gehiegiz egosiz gero, belztu egingo da nahastea, eta karamelua egingo zaizu. Almibar zurixka bat lortu behar dugu esperimentu honetarako.
  • Busti izozki zotzak prestatu berri duzun almibarraz, eta utzi lehortzen. Zutik eusteko, arropa esekitzeko pintzekin heldu ditzakezu.
  • Bota nahastea edalontzietara. Nahi izanez gero, gehitu koloregaia eta urrinak.
  • Nahastea hoztutakoan (oso garrantzizkoa da hotz egotea), jarri izozki zotzak edalontzietan, hondoa ukitzen ez dutela. Erabili pintza bat horrela eusteko.
  • Estali aluminiozko paperez edo sukaldeko paperez, hautsik ez sartzeko.
  • Piruletak egiteko astebete eta bi aste bitarte beharko ditugu (inguru baldintzen arabera), baina prestatu eta ordu gutxira ikusiko duzu azukre kristalak nola hasten diren handitzen.
  • Kristalak behar bezainbeste handitutakoan, atera piruletak eta jarri edalontzi batean (pintza batekin eutsita); utzi zenbait orduz lehortzen.
  • Dastatu zure piruletak.
separator

NOLA LITEKE?

Disoluzio saturatua. Azukreak uretan duen disolbagarritasuna areagotu egiten da tenperaturarekin; horrek esan nahi du azukre gehiago urtu dezakegula ur berotan, ur hotzetan baino. Hala, ura irakinez gero, azukre kantitate handiena disolbatzea lortuko dugu. Urak ezin duenean azukre gehiago onartu, tenperatura horretarako disoluzio saturatua izango dugu.

Disoluzio gainsaturatua. Almibarra duen kazola sutatik kendu orduko, hozten hasiko da. Baldintza horietan, urak tenperatura horretan disolba dezakeena baino azukre gehiago du. Horri deritzo disoluzio gainsaturatua. Nahastean perturbazio txiki bat gertatu orduko (adibidez, pixka bat eraginez gero), hauts izpitxo bat erori orduko, edalontzian inperfekzioren bat egonez gero edo objektu zimurren bat edalontzian sartuz gero (adibidez, izozki zotz bat), azukre gehiegiak disoluzioa abandonatuko du. Horrek esan nahi du azukre disolbatua solidoa izango dela berriro; hau da, kristaldu egingo da.

Tenperaturaren efektuaz gainera, denborak aurrera egin ahala, almibarrean dagoen ura lurrunduz joango da. Ura galdu ahala, berriz, azukre gehiegia sortuko da disoluzioan. Horregatik, esperimentua bizkorrago egin daiteke lurruntze baldintza egokietan, giro lehor eta beroan, alegia.

separator
to top button

COOKIE-EN ERABILERA

Esperimentuak.eus-en geure eta beste batzuen cookieak erabiltzen ditugu nabigatzeko esperientzia hobetzeko. Nabigatzen jarraitzen baduzu, gure cookieen politika. onartzen duzula ulertuko dugu. Informazio gehiago: Cookien politika

ACEPTAR
Aviso de cookies